Sápmi representing @ Rockheim

Rockheim, Riddu Riđđu jïh Márkomeannu feesteiehkiedasse böörede såemies Saepmien veaksahkommes gïeligujmie. Daate akte laavenjostoe Tråantine 2017, aavoedimmie 100-jaepienheevehtimmeste saemiej voestes rijhketjåanghkoste Tråantesne.

Tråante 2017 edtja akte stoerre mïerhkesjimmie årrodh  aktede 100 jaepiej gæmhposte demokratijen, reaktavoeten jïh gellievoeten gaavhtan. Gïeh eah bööremes sjïehth daam heevehtimmiem geehpehtidh goh 3 noere artisth buelije eadtjohkevoetine jïh jïjnje vaajmosne?

Maxida Märak akte Davos gïrremejoejkestæjja mij gaskem jeatjah leah våajnoes orreme gæmhposne gruvaindustrijen vööste Saepmesne. Eerlege jïh politihkeles teekstigujmie dïhte lea åehpies goh akte mij daamtaj «fer jïjnjem» vadta goh fer vaenie. Dïhte Rockheimese båata aktine orre Ep:ine låammesne jïh akte eevre orre live-settine.

SlinCraze musihkine jïh rap’ine eelki gosse lij ajve 14 jaepien båeries. Altese teeksth lea dan bïjre guktie jielede goh saemie maahta årrodh, akte jielede gusnie maahta dovne vaanesovmh jïh raasismem dåastodh. SlinCrazen dïjre lea raeffie, gieriesvoete jïh jååhkesjimmie saaht mij religijovne, kultuvre jïh legninge!

Politihkeles teekstigujmie jïh åajvoeh vokaaleteknihkine dïhte såevmien-saemien rappere Ailu Valle åehpies sjïdteme. Dïhte rappede gaskem jeatjah guktie dïhte jillege jieledevuekie eatnemem jïh saemiej jieliemassem goerpedahta. Valle baantem Trio Boogiemen meatan åtna.

Anne Fossen, prosjekteevtiedæjja Rockheimesne jeahta, «Daate akte vadtese Tråanten årrojh eah gåessie gih aarebi åådtjeme! Hiphop åajvemes mïerhkeste Saepmeste: JÏH mijjieh buektiehtibie dam namhtah faalehtidh almetjidie!»

Riddu Riđđunfestivaaleåvtehke Karoline Trollvik jeahta, «Saemien hip-hoperh leah bïegkesne orreme aktem ståantem daelie, joekoen dej veaksehks teeksti jïh fraakas dåemiedimmien gaavhtan. Riddu Riđđu lea garmeres ihke mijjieh limh maahteme aavoedimmiem Tråantesne dåarjoehtidh. Mijjieh ulmine utnebe gamtoem saemien kåansteste jïh kultuvreste åehpiedehtedh jieniebinie scenine abpe jaepien. Jïh joekoen hijven lea maehtedh faalehtidh såemies dejstie nööremes jïh fraakasommes artistide mijjieh utnebe.»

«Daate akte iehkede Tråante sæjhta seenhte åajaldidh! Daesnie tjuara ajve gåårvedidh jïh meatan årrodh 100-jaepienheevehtimmiem aavoedidh mijjine ektine» Markomeannun festivaaleprodusente Susanne Langstrand-Andersen geerjene jeahta.

Sijjie jïh tïjje:
Öörnedimmie lea Rockheimesne goeven 10.b. 2017 ts. 20:00

Saemiedigkie jïh Noerhtelaanti kultuvrefoente öörnedimmiem dåarjoeh.