AGNETE & MARJA

Ii fuonit go Norgga doaivva Melodi Grand Prix:s, Agnete Johnsen, galleda dán jagáš Márkomeanu. Dan seamma dahká Marja Mortensson, lullisámenieida guhte lea julkkihan váimmuid miehtá Sámi iežas čáppa luđiiguin.

Festiválajođiheaddji Marita Eilertsen lea nu rámis ahte measta girdila go almmuha dan boahtte guokte artistta 2016 Márkomennui.

Agnete lea albma "icebreaker" midjiide! Son lea šaddan sámi rámisvuođa symbolan, ja lean sihkkar ahte olugat leat ovttaoaivilis muinna go dajan ahte son vuoiga lea ovdagovva, dadjá Eilertsen.  

Sámenieida Unjárggas Finnmárkkus eret lea beaggán sihke NRK Stjernekamp prográmmas, ja vuoitin TV2 Skal vi danse prográmmas. Muhto lea eanemus dovddus go vuittii nu čielgasit dán jagáš finálas Norgga Melodi Grand Prix:s.

Earret Agnete, de almmuha Márkomeannu vel nuppi sámi nissonnástti, namalassii Marja Mortenssona. Nuorra lullisámi artista lea juoigan Majesteahta Gonagassii, ja lea čalmmustan iežas dovddus sámi artistan daid maŋimuš jagiid. Son beaggá leat áidnalunddot artista guhte addá áibbas erenoamáš musihkalaš vásáhusa, ja oasáža máisttu lullisámi kultuvrras.

 Lean hui ilus ja rámis go beasan ovdanbuktit sihke Agnete Johnsena ja Marja Mortenssona min gussiide. Leaba guokte gievrras ja nanu artistta, gean guoktá buohkat sáhttet illudit geahččat geassit, dadjá movttegis festiválajođiheaddji.

Márkomeannu sáva dieđusge ahte lea Eurovision Song Contest vuoiti gean beassat oaidnit Márkomeannu-lávddis dán geasi!