NUORAID SESSIONS – DÁ SII LEAT!

Dan dálvvi lea Markomeannu ohcan nuoraid geat galget oažžut vejolašvuođa gárvet ja vel ovdanbuktit sin šuoŋaid Márkomeanu festiválas. Boahttevaš násttit leat dál válljejuvvon.  Emma Elliane Oskal Valkeapää, Hildá Birget Länsman, Elin Kristina Oskal, Ella Marie Hætta Isaksen ja Natalie Carrion leat min boahttevaš násttit. 

 Govven: Mats Suhr Pettersen / Privat

Govven: Mats Suhr Pettersen / Privat

Emma Elliane lea 16 jagi ja lea Guovdageainnus eret Finnmárkkus. Son lea lávlun ja čallan lávlagiid dan rájes go lei unni, ja lea juo lea oassálasttán MGP jr. 2011:s.  Oassálasttán lea vel UKM:s, Sápmi Talent:s ja Nordic Light festiválas . Cuoŋomanus son almmuhii su vuosttaš skearru ”Dovddut eai gielis”. Son oassálastá dal Nuoraid Sessions:ss vai beassá ovddidit iežas musihka ovttain eará nuoraiguin geat beroštit musihkas, ja vel oažžut veahki profešuneallamusihkkariin.

Hilda lea 22 jagi, eret Ohcejogas Suomabeale Sámis. Son lea juo musihkkaoahpuid bokte iežas karrieara bidjan johtui, ja son sihke lávlo ja juoigá. Solju joavkkus lea mielde, geat dán jagi oassálaste suoma MGP gilvvus. Su mihttu lea sihkkarastit bistevašvuođa sámi gielas ja juoiganárbbis, addin bokte sámi álbmogii musihka ja musihkkahistorjá.

Elin Kristina lea 20 jagi, eret Saltaduottaris Nordlánddas. Son čállá lávlagiid máŋga gillii, muhto liiko buoremusat čállit sámegilli. Su mielas lea álkibut ovdanbuktit ja čilget dovdduid eatnigillii. Son liiko sihke čállit teavsttaid, lávlut ja juoigat! Šaddá gelddolaš oaidnit maid Elin áigo ovdanbuktit Márkomeanus.

Natalie lea 20 jagi, eret Ubmis Ruoŧabeale Sámis. Lágamus su váimmu lea musihkka ja su kultuvra. Sus lea áŋggaštus doalahit iežan árbbi juohke lávkkis maid váldá. Son lea bargan viššalit šaddat nu buorre artistan go vejolaš, ja lea gearggus gávnnahit maid Sápmi ja Márkomeannu ovdanbuktet. Son lea e.e. Nuoraid lávddis lávlon Johkamohkis. Son illuda juohkit iežas lávlagiid Márkomeanu lávddis geasset. 

Ella Marie lea 18 jagi, Deanus Finnmárkkus eret. Dál orru son Álttás gos vázzá drámálinjjá. Varra lea son didjiide juo oahpis, go oainnát vuittii dán jagáš Sámi Grand Prixa! Dasa lassin son lea oassálastán Scene Finnmárkku/ Ung Artist NOW! prošeavttas, ja mátkkoštan Arctic Winter Games oktavuođas ovddastit sámi kultuvrra. Son ráhkada alternatiiva popmusihka, ja sus lea áigumuš bargat musihkain ovddasguvlui.  

Dáid vihtta nuoraid mielde bohtet maid njeallje musihkkára lávdde ala Márkomeanus. Joavkkus leat Svein Schultz bássain, Jan Ole Kristensen gitáras, Jakop Janssønn trommain ja Stein Austrud keyboardas.

Sii čuojahit buohkat Márkomeanu lávddis lávvordaga Suoidnemánu 30. b. Oaidnalit!

Giitu Sámediggái geat leat prošeavtta doarjun.