Agnete šluhtte, spellemannvuoiti gahppá sisa

Foto: CF-Wesenberg/kolonihaven.no

Foto: CF-Wesenberg/kolonihaven.no

Agnete Johnsen šluhtte plánejuvvon konseartta dán jagi Márkomeanus. Son guhte gahppá sisa lea beakkán spellemannvuoiti Niko Valkeapää. 

Beare 3 vahku festivála ovdal buktá Márkomeannu ođđasa ahte Agnete Johnsen šluhtte iežas konseartta festiválas. Muhto festiválajođiheaddji Marita Eilertsen ii gal heađásnuva. Son lohpida gis miellagiddevaš konseartta beakkán Niko Valkeapää’ain.

- Dieđus lea váivves diehtu oažžut, muhto mii hui illudit vuosehit Niko Valkeapää min festiválagussiide, mojohallá festiválajođiheaddji Eilertsen.

Sierra šuokŋa

Niko Valkeapää lea bajásšaddan Heahtás Davvi-Suomas, guovlu mas lea rádji sihke Norgii ja Ruŧŧii. Lei vuosttaš geardde lávddis 7-jahkásažžan, ovttas etniinis ja ristáhčiinis Nils Aslak Valkeapää. Vuittii Sámi Grand Prix 1994 ja 1995 ja almmuhii iežas vuosttaš skearru 2003 – man ovddas vuittii spellemannbálkkašumi rabas luohkás.

Dán maŋŋil lea almmuhan vel vihtta skearru, ja stiila lea johtán iešguđetlágan surggiid bokte, nugo pop, rock, jazz, elektronika, americana, blues, world music, muhto álo gámno sierra šuokŋa midjas addá musihkkii Niko Valkeapää-dobdomearkka. 2015 bođii su guđat skearru “Ráfi – Tranquility”, ja ieš cealká ahte lea gámnan iežas dán skearrus.

- Guldaleaddjit vásihivččet gal stiilarievdadusa Niko maŋimus skearrus. Son lea máhccán iežas ruohtasiidda, ja mu vásáhus lea ahte musihkas leat nu dievva dobddut, dadjá Eilertsen.

Niko Valkeapää lea ožžon máŋga bálkkašumi ja lea čuojahan festiválain miehta máilmmis.

Persovnnalaš sivat

Agnete Johnsen šluhtte iežas konseartta persovnnalaš sivain, ja cealká e-poasttas festiválii ahte sávvá beassat máhccat eará háve.

Márkomeannu lágiduvvo suoidnemánu 28.-31. beivviid Gállogiettis Evenášši suohkanis, ja spellemannvuoiti Niko Valkeapää sáhtát vásihit lávvardaga diibmu 20.00.