Dulkot nieguid festiválas

Márkomeanus loktejuvvo oassi sámi kulturárbbis mii ii digaštallo nu dávjá almmolašvuođas, namalassii nieguid dulkon. Ovttas Várdobáiki sámi guovddážiin bovde festivála ságastallamii earret eará "niegadeddjiiguin".

 Govven: Sergey Gavrilov

Govven: Sergey Gavrilov

- Niegut leat dehálaš oassi sámi kulturárbbis, muhto 2016:s eai leat buohkat geat dihtet mo galgá dulkot jus ovdamearkka dihte niegada heajaid, hávdádeami, ruđaid, dihkiid dahje biepmu. Mis lea lihkku geain ain leat olusat min searvvis geat dulkojit iežaset nieguid, ja sáhttet ofelastit min rivttes guvlui, muitala Márkomeanu festiválajođiheaddji, Marita Kristin Eilertsen.

Eilertsen namuha erenoamážit mo niegut sáhttet leat ovdosat. – Min sámi giliin leat ollu muitalusat mo niegut leat buktán ovdosiid mat leat leamaš veahkkin olbmuide iešguđetge láhkai, muitala Eilertsen.

Sus lea ovdamearka dálááiggis:

– Mis lea čávvaláhttu guhte juohke jagi muitala ahte son deddohallá sullii mánu ovdal festivála ja niegada ahte ii mihkkige leat gearggus festiválii. Dalle son diehtá ahte dál lea áigi čohkket searaid ja áŋgiruššat vai buot gárvána festiválii, nu ahte sáhttá soaitá dadjat ahte niegut veahkehit Márkomeanu lágiduvvot, moddjá festiválajođiheaddji.

Várdobáiki sámi guovddáža museajođiheaddji, Marit Myrvoll, jođiha ságastallama mii lea dii. 16.00 Márkomeanu bearjadaga suoidnemánu 29. b.