Bivnnut livejoavku Márkomennui - Biru Baby!

Govven: Biru Baby

Govven: Biru Baby

Márkomennui, cikcu buollašis duoddaris davvin, boahtá revolušuvnnalaš joavku Biru Baby iežas imašlaš stiillain ja soundain. Festiválabuvttadeaddji Susanne Amalie Langstrand-Andersen oaivvilda dá lea livekonsearta man ii oktage galgga manahit.

- Lea booking mainna mii leat hui duhtavaččat! Biru Baby lea oalle ođđa urbi sámi artistamáilmmis, ja singuin boahtá maiddá áibbas ođđa šáŋŋer. Go sii lávkejit lávdái de eai leat vuolgán soabadallat, ja máŋgga láhkái de ovddastit sii ođđa feministalihkadusa man vuohttit Sámis, muitala festiválabuvttadeaddji Susanne Amalie Langstrand-Andersen.

Joavku seaguha dološ sámi luođi ođđaáiggi sivilisašuvnna next level musihkain. Bohtosat gohčoduvvojit "jáhkkemeahttumin", “briljánta áidnalunddogin" ja "Babymetal sivrras". Biru Baby váldoláhtut leaba sámenieiddaguovttis Iki ja Hánná, ja gaskkohagaid leat artisttat nugo Hell-G ja KT (In Da House) joavkku lassin mielde konsearttain.

- Biru Baby lea doallan muhttin mielahis konsearttaid 2016:s, ja musihkkabirrasis leat sii šaddan dábálaš ságastallanfáddán. Lea duohta illu beassat presenteret sin Márkomeannugussiide, dadjá Langstrand-Andersen.

Musihkkasuorgefestiválas Trondheim Callingas nammaduvvui Biru Baby eanemus imašlaš oassin prográmmas, ja iešguđetge musihkkamagasiinnat ja musihkkajournalisttat atne sin festivála "vuoitin". Nappo lea láhččojuvvon erenoamáš vásáhussii konseartalávddis Evenáššis.