MÁRKOMEANNUPLAKÁHTA 2016
Muittaš minguin dan botta go vuordit dán jagáš plakáhta!
Dál ii leat guhká dassá mii leat gergosat almmuhit dán jagáš Márkomeannuprográmma didjiide, ja seammás maiddá dán jagáš plakáhta ja grafihkalaš profiilla! Mii leat vuosttažin dovddastit ahte mii smiehttat ja bargat ollu juohke áidna Márkomeannuplakáhtain. Áiggiid čađa leat mis leamaš máŋga gelddolaš plakáhta, muhttinat leat dagahan digaštallamiid, nuppiid ges sáhttá gohčodit fiáskon. Dat mii lea oktasaš buot dáin plakáhtain lea ahte mii leat geahččalan darvehit Márkomeanu sielu daiguin, muhto seammás maiddá vuosehit dan mii dáhpáhuvvá Sámis.
Dán jagáš plakáhta ii spiehkas das, ja mii leat hui gealdagasas mo dii váldibehtet dan vuostá. Maiddá dán jagi lea jurdda vuolgán Márkomeanu čávas, ja lea Tor Åge Vorren Røst kommunikasjon:s guhte lea hábmen jurdaga. Dan botta go mii vuordit gealdagasas, sáhttit geahčadit veahá plakáhtaid ovdalis jagiin.
2005 šattai "Joikabollebártni" jahkin. Sihke plakáhta ja t-báiddit šadde bivnnuhat! Sáhttá soaitá dadjat ahte dá lei dat vuosttaš plakáhta mainna mii válddiimet ovtta lávkki viidásat hábmema dáfus. Dan áiggi lei beakkán olgobáiki Guovdageainnus mii válljii "Joikabollebártni" oassin sin stohpohervemis.
Okta dain plakáhtain mii ii lihkostuvvan nu bures lei 2010:s. Čurot. Soapmásiid mielas dat lei stuorra fiásko, muhto earát ges ráhkistedje hábmema ja ain geavahit 2010 t-báiddi viššalit.
2012:s vuostálasttiimet riikkaoasi ja majoritehta miellaguottuid sámi geaidnogalbbaid vuostá. Digaštallan sámi galbbaid birra lei ovdánan heittogit 2011:s, ja sihke medias ja neahtas sáhtiimet lohkat vaššás cealkámušaid sihke sámi galbbaid ja sápmelaččaid birra.
2013 lei sámi girl power-jahki, ja vuosehii sámi nieiddaid ja nissoniid nu mo mii sin oaidnit. Gievrrat ja jálut. Dát lei dat jahki goas muđui riikkas čalmmustahtte ahte nissoniin lei leamaš jienastanvuoigatvuohta 100 jagi Norggas.
2015:s almmuheimmet dan plakáhta mii soaitá leamaš digaštallon eanemusat. Sámi vuostálastindáidda lei fáddán 2015 festiválaprográmmas, ja plakáhta šattai lunddolaš álgun prográmmii. Soapmásat oaivvildedje plakáhta leat menddo duođalažžan ja politihkalažžan geassefestiválii, earátges deaddiledje plakáhta váimmuideaset ja heŋgejedje dan stohpui seaidnái gos buohkat dan oidnet.
Na, maid son mii 2016:s oaidnit bussevuordinsajis ja gávpeseainnis?
Mii duođaid oaivvildat go mii čuovgi čalmmiiguin dadjat ahte mii leat erenoamáš rámis dán jagáš Márkomeannuplakáhtain. Nu go ovdalaš jagiidge, de mii cealkit juoga plakáhtain, njulgestaga danne go Márkomeannu háliida leat mielde rievdadit Sámi positiivvalaččat. Mii illudat sakka ovdanbuktit sihke plakáhta ja festiválaprográmma didjiide miessemánu 28. b!
Gulak go buzza?