Ilut maŋŋá maŋŋálaga
Márkomeannu 2017 lahkonišgoahtá ja prográmma lea válmmas. Suoidnemánu maŋemus vahkkoloahpa besset sii, geat bohtet guossin festiválii, vásihit golbma beaivvi dievva konsearttaiguin, gelddolaš kulturvásáhusaiguin ja veaháš earálágán ságastallamiin komihkkáriin Trine Lise Olseniin.
Go Márkomeannu lágiduvvo dál 18. gearddi, de bovdejit álbmoga searvaladdat valljugas dáidda- ja kulturvásáhusaide; diŋgojuvvon bihttá, historjávázzin, áibbas sierra prográmma mánáide ja nuoraide, vuovddi dievva ipmašat ja ollu eará. Festivála dárjjusta vel ovtta maŋemus herskko konseartaprográmmii, namalassii ruoŧa bealde hip-hop vávastusa, Maxida Märaka. Deatnogátte nuorat, Biru Baby, SlinCraze, ISÁK ja Kalle Urheim leat jo almmuhuvvon.
- Jus galggan namuhit maid ieš illudan vásihit prográmmas, de namuhan dán jagi diŋgojuvvon bihtá, márkomeannu#EANAN, ságastallama Trine Lise Olseniin, Studio Válga maid NRK Sámi Ronald Pulk jođiha, ja beakkán Deatnogátte nuoraid konseartta, dadjá festiválabuvttadeaddji Susanne Amalie Langstrand-Andersen, gii lea hui gealdagasas.
Tråante 2017 – sámi 100 jagi ávvudeapmi
Ávvudeapmái leat maiddái láhčán saji dán jagi Márkomeanus. Dán jagi lea namalassii 100 jagi áigi dan rájes go dat, mii lea nammasan vuosttaš miehtásámi čoahkkimin, lágiduvvui guovvamánu 6.- 9.b. 1917:s Troandimis, dahje Tråantes, nugo oarjelsámegillii lea namma.
- Áigut diehttelasasge čalmmustahttit ávvudeami iežamet ládje. Diŋgojuvvon bihttá, márkomeannu#EANAN, galgá leat dakkár maid gal eat leat ovdal oaidnán, ja dat lea min vuohki čalmmustahttit 100 jagi dáistaleami demokratiija, vuoiggalašvuođa ja máŋggabealatvuođa ovddas, dadjá Langstrand-Andersen.
Buohkaide
Festiválabuvttadeaddjis Susanne Amalie Langstrand-Andersenis lea jáhkku ahte dán jagi prográmmas lea buohkaide juoga, ja sávvá oaidnit olles guovllu álbmoga dán jagi festiválas.
– Márkomeannu lea sámi festivála, mii čevllohallá dainna go das lea vierru fállat juohke sámi guovllu kultuvrra, ja hirbmat girjáivuođa. Dieđán ahte buohkat sáhttet illudit min festiválas ja gávdnat prográmmas juoidá mii sidjiide heive. Jus ii, de galget goit boahtit duššo fal dan buori vuoiŋŋa ja njálgga festiválaborramuša dihte, loahpaha festiválabuvttadeaddji.