Festiválagirjerájus

2010 sáhttá vuosttaš geardde vásihit girjerájusbálvalusa Márkomeanus.

Ovttasbarggus Oarje-Romssa girje- ja kulturbussiin, Nuortalátti fylkkagirjerádjosiin ja Romssa fylkkagirjerádjosiin lágiduvvo festiválagirjerájus gonnes sáhttá gáfestallat ja lohkat áviissaid, fitnat interneahtas, láddet giehtatelefuvnna, guldalit musihka ja dieđun lodnet girjjiid ja eará mediaid.

Festiválagirjerádjosis lea nai sierra prográmma sihke mánáide, nuoraide ja rávisolbmuide.

Mánáidprográmmas guoimmuha luohtepoehta Ánte Mihkkal Gaup gehččiid, ja nuoraidprográmmas lea nuorra girječálli ja juoigi Simon Issát Marainena vuorru čuovgat.

Rávisolbmuid prográmmas fas galgá girječálli John Gustavsen logaldallat Johan Turi birra, guhte 1910 almmuhii girjji Muitalus sámiid birra, vuosttaš čáppagirjjáláš sámegielat girjealmmuhus.

Festiválagirjerádjosa ráhpanáiggit leat:
Duorastat: 17.30-19.00
Bearjadat: 11.00-19.00
Lávvardat: 11.00-19.00

Norsk side