Márkomeannu festivála hoavda, Beatrice Fløystad, oaivvilda ahte Sámediggi vuoruha imašlaččat go ii atte ruđalaš doarjaga sámi mánáid ja nuoraid doaimmaide.
Márkomeannu lea bearašfestivála mas lea ulbmilin buoridit identitehta márkosámi guovllus, ja dan oktavuođas lea mánáid- ja nuoraiddoaimmat okta dain deháleamos áššiin festiválas.
- Márkomeannu Mánáidmeannu-festiválii mii leat ohcan ruđalaš doarjaga sámi mánáid ja nuoraid gávnnadan-arenaide. Dakkár gávnnadan-arenat buoridit ja ovddistit mánáid báikkálaš bajásšaddan-birrasa ja leat vuoruhuvvon doaimmat Sámedikki 2009 bušeahtta, čilge festiválahoavda Beatrice Fløystad.
Dađi bahát Sámedikki áššemeannudeaddji dieđiha ahte ruohtadoarjja biehttaluvvo. Márkomeannu ii dieđe vel manne ruohta ii juolluduvvon, go čálalaš vástádus ii leat vel ihtan.
- In sáhte ipmirdit mii sivva dasa sáhtášii leat. Leaš go dát ahte Márkomeannu lea ožžon lasihuvvon fásta doarjaga, muhto dát doarjja lea čadnon artistabálkkáide ja ii sáhte dan sivas geavahuvvot mánáiddoaimmaide, joatká healmmastuvvon Fløystad.
Lea čuožžilan eahpesihkkarvuohta nagodeaš go Márkomeannu čađahit plánejuvvon mánáid- ja nuoraiddoaimmaid 2009s.
- Lea issoras váidalahtti jos mii vertet geasit ruoktut Mánáidmeannu fálaldaga. Dalle festivála váillážii mánáid ja nuoraid fálaldagaid, ja ii sáhtáše šat gohčoduvvon veahkafestiválan. Mii sávvat ahte Sámediggi meannudivččii ođđasit ohcama ja bearráigeahčašii ahte mánáide nai lea festiválafálaldat, loahpaha Fløystad.