Duorastat eahkeda čuožžu girječálli Sigbjørn Skåden Márkomeanu lávddis artistan, logi jagi maŋŋil go lei mielde festivála álggaheame.
-------------------------------------------------------------------------Govven: Susanne A. Andersen
1999 lei Skåden mielde nuoraidsearvvis Stuornjárgga Sámenuorak, midjas vuođđudii Márkomeanu. 2009 ovdanbuktá son diŋgojuvvon buktaga Rorschacha bleahkkaredehat seamma festiválas, ovttas musihkkariiguin Stein Kvaal Hageberg ja Gaute Barlindhaug.
Rorschacha bleahkkareidehat lea poesiija-/elektronikačájálmas man álgga vuolgá beakkán psykiáhter Herman Rorschacha assosiatiiva bleahkkaiskosis. Čájálmasas seaguhuvvojit poesiija elektronalaš musihkain, visuála projek-
šuvnnaiguin duogážis, ja visot čujuha konsumerdobdui industriála birrasis.
- Rorschach-iskosa vuođđu han lea ahte iskosa bokte galgá gámnnahallat geat mii siskkožis duođaid leat, ja historjjálaš sámi perspektiivva ektui lea suohtas stoahkat diekkár paralleallaiguin, dadjá Skåden.
Go Márkomeannu diibmá jearai Skådenis reidet dán jagi diŋgojuvvon buktaga festiválii, lei hástalus midjas hui illudahtii su. Oaččui ollislaš friddjavuođa ieš hábmet buktaga.
- Lean hui ávus ahte lean Márkomeanus ožžon dan vejolašvuođa, ja leat leahkán oba buorre beassat nu friddjat ieš mearridit goktes galggai šaddat. In leat ovdal nu lahka ovttasbargan eará dáiddáriiguin, ja lea leahkán munnje earenoamáš buorre vásáhus ovttasbargat nie guokte musihkkáriin. Ja lea doaibman oba buoragit, muitala Skåden.
Logi jagi mat leat mannan Márkomeanu álgaga rájis, lea Skåden šaddan gudnejahtton sámi girječállin. 2007 nammaduvvui Davviriikkalaš Ráđi girjjálašvuođabálkkašupmái diktagirjji Skuovvadeddjiid gonagas ovddas, ja dán čavčča boahtá su ođđa girji, Prekariáhta lávlla. Muhto álggus lea Márkomeannu ja Rorschacha bleahkkareidehat.
- Ii mihkkege lea buoret go iežan siiddabáikkis ovdanbuktit diekkár buktaga. Muhto ii mihkkege leat eanet suorggahahtti ge. Lean gal veahá balus, loahpaha Skåden.
Čájálmasa teavsttat leat sihke sámegillii ja dárogillii. Gráfalaš hábmejeaddji Tor Åge Vorren lea reiden projekšuvnnaid mat vuosehuvvojit lávddis.
Čájálmas oidno duorastat geassemánu 30. beaivvi dii. 19.00 Loabagáiddi gilihuotnahis.