Dán jagáš Márkomeanus beasat vásihit sámi dáidaga eará láhkai go leat hárjánan. Go festivála rahpá verráha duorastaga suoidnemánu 29. beaivvi, de lea boares museašillju rievdan ođđaáiggi, sámi dáidaga ovdanbuktimii maid guovlu ii leat oaidnán guhkes áigái.
FESTIVÁLAJODIHEADDJI: Runar Myrnes Balto.
-----------------------------Govven: Ellen Berit Dalbakk / Márkomeannu
Márkomeannu 2010 hálida leat mielde sámi kultuvrra ja sámi dáidaga ovdan-buktima ovdánahttimis.
- Mii ávuhat festiválagussiid vánddardit rabas mielain festiválabáikkis, dadjá festiválajođiheaddji Runar Myrnes Balto.
Lihkahusak
Dán jagáš festiválaskeaŋka Márkomeanus festiválagussiide lea Lihkahusak.
- Prošeakta ii leat beare oidnosis festiválaguovllus, mii maiddá deavdit guovllu čáppa dajahusaiguin ja čuorvumiin sámegillii, mat leat stuorra installašuvnnaid ja galbbaid hámis almmolaš báikkiin, lohpida Myrnes Balto.
Prošeavtta namma, Lihkahusak, vuolgá lestadiánalaš lihkahusain mat odne ain leat lestadiánalaš oskkus. Sáni sáhttá maid geavahit čilget dan dovddu mii máŋgasiin lea sámi festiválas. Čalmmustahttit Ufuohta- ja Lulli-Romssa guovlluid suopmana lea dehálaš oassi prošeavttas, ja buot installašuvnnat ja galbbat leat ge dán suopmanii čállon.
Eahpedábálaš váldočájáhus
Dán jagáš Márkomeannu váldočájáhus lea ovttasbargu sámi arkiteavtta Joar Nango, dáiddára Sille Storihle ja viessogálvohábmejeaddji Silje Figenschou Thoresen gaskkas. Sii dagahit dáiddajoavku Sierraoaivila skovlá. Čájáhus doaibmá sorjjasmeahttun foruman fágaidrasttildeaddji digaštallamiidda huksendáidaga, hábmema ja dálááiggi dáidaga birra.
- Dehálaš oassi váldočájáhusas lea proseassa álggus lohppii. Mii eat dieđe mo loahpalaš boađus šaddá, muhto mii sáhttit gal dadjat ahte čájáhus lea ovtta láhkái dál jo álgán, dadjá Myrnes Balto.
Sihke Lihkahusak ja váldočájáhusa almmolaš rahpan lea festivála-rahpamis duorastaga suoidnemánu 29. beaivvi dii 17.00 Gállogiettis.