Mánuskursa nuoraide, midjas galggai boahtte disdaga álgit, lea oaniduvvon čieža beaivvis guokte beaivái dan dihte go unnán nuorat ledje dieđihan. Ođđa kursaálgu lea mánnodat suoidnemánu 26. beaivvi.
----------------------------------------Arkiivagovva: Márkomeannu
Festiválavahkku álgá dalle mánuskurssain, midjas lágiduvvo mánnodat suoidnemánu 26. beaivvi ja disdat suoidnemánu 27. beaivvi. Kurssa bagadalli lea ain sámi mánusčálli Åse Kathrin Vuolab, midjas čakčat 2009 lei guhtta studeantta gaskkas geat besse sisa rámiduvvon mánussuorgái Norgga Filbmaskovllás Lillehammeris.
Álgojurdda lei ahte kursa galggai buvttadit mánusa teáhtervuosehussii midjas galgá vuosehuvvot sihke teáhterkurssas nuoraide ja festiválabáikkis lávvardaga festiválavahkus. Oaniduvvon kursaáigi dahká dál ahte kursa oažžu veahá eará hámi. Dál šaddá kursa bargobadjin gonnes oasseváldit oahpahuvvojit mánusbarggus ja iešguđetlágan teknihkain mánusreidemii.
Teáhterkursa nuoraide manná nugo oaivvilduvvon, gaskavahkku suoidnemánu 28. beaivvis lávvardat suoidnemánu 31. beaivái, muhto dál vuođđuduvvon teáhtermánusii man Åse Kathrin Vuolab lea čállán. Kursa loahpahuvvo teáhtermánusa vuosttášvuosehusain festiválabáikkis Gállogiettis lávvardaga suoidnemánu 31. beaivvi dii. 15.30.
Sihke mánuskursa ja teáhterkursa lea nuvttá. Márkomeannu dasa lassin gokčá mátkki, orruma ja festiválapássa oasseváldiide. Ođđa dieđihanáigemearri goabbá kurssaide lea bearjadat suoidnemánu 23. beaivvi, e-poastta bokte ellen@markomeannu.no dahje telefuvnna bokte +47 974 21 82.
Goabbá kurssat leat hiebahuvvon nuoraide 12 jagis ja boarrásit. Sihke sámi ja dáčča nuorat leat buoragit boahtin oasseváldin.