Mánáidmeannu ja Nuoraidmeannu lea gártan dehálaš oassin Márkomeanu festiválas, ja fálaldat sidjiide viiddiduvvoge juohke jagi. Lágideamit, mii lea festivála nuorra oassálasttiid iežaset festivála, álgá juo mánnodaga suoidnemánu 26. beaivvi, ja dál leage áigi boahtán dieđihit iežas iešguđet doaimmaide.
--------------------------------------------------------Govven: Ellen Berit Dalbakk / Márkomeannu
Nuoraid doalut ráhppojuvvo manuskurssain, Nuoraidmeanus, masa dieđihan áigemearri dađi bahábut lea vássán.
Muđuid álgá Mánáidmeannu gaskavahkku suoidnemánu 28. beaivvi, ja dasa lea ain vejolaščájehit beroštumi. Gaskavahkku mánát vulget meahce-ekspedišuvdnii Dielddásullui, gos gal hástalusat eai váilo. Doppe mánát galget sihke gizzut ja rasttildit bávttiid, stuorra geđggiid, muoraid, ja mat dal de ain ležžet vuordimis go johtá meahciin. Mánáid meahce-ekspedišuvdnii lea dieđihanáigemearri mánnodaga suoidnemánu 26. beaivvi.
Gaskavahkku lea maiddái Nuoraidmeanus teáhterkursa mainna oassálastit barget teáhterčájálmasa ráhkadit.
Duorastaga suoidnemánu 29. beaivvi lea ges nuoraid vuorru suohtastallat meahcis. Sin mátkti manná maiddái Dielddásullui, gos earret eará galget idjadit lávus iežaset gohtten sajis, mii gohčoduvvo Camp Nuorra. Nuoraide lohpiduvvojit ođđa hástalusat, ja oahpaheaddjiguovttos Andrè Madvig Wagelid ja Sondre Markusson galgaba earret eará oahpahit nuoraid mo galgá mearrakajahkain sukat. Dieđihanáigemearri Camp Nuorra:ii lea mánnodaga suoidnemánu 26. beaivvi.
Duorastaga lágiduvvo maiddái mánáide erenoamáš ja somás karusealla, nammalassii Čuojanaskarusealla. Karusellii leat ráddejuvvon sajit, ja dieđihanáigemearri lea mánnodaga suoidnemánu 26. beaivvi.
Muđuid sáhttet mánát ja nuorat oassálastit nugo stoahkan beaivvis Duhát doaimma Gállogiettis , festivála girjerádjosa galledit, dahje guldalit čáppa šuoŋaid konsearttain.
Buot doaimmaide maiguin lea dieđihanáigemearri, galgá dieđihit dán čujuhussii: ellen@markomeannu.no.